La Fundació Pública Institut d’Estudis Ilerdencs de la Diputació de Lleida, el Conselh Generau d’Aran i la Càtedra d’Estudis Occitans convoquen aquest any 2013 la desena edició del Prèmi de Raconte en Occitan. Tot seguit en teniu les bases:
REGLAMENT
1. Per concórrer al Prèmi, los trabalhs devon remplir las condicions seguentas:
a) Èsser inedits e escriches en occitan. Los trabalhs deuràn respectar la normativa establida per Loís Alibèrt dins sa Gramatica Occitana.
b) Aver una longor minimala de 100 paginas e maximala de 200 paginas, al format DINA4, amb la polissa Times New Roman, còrs 12 e espaci simple. Lo document deu èsser escrich sus una sola fàcia.
c) Aver pas ganhat un autre prèmi, ni esperar tanpauc lo verdicte d’autres prèmis.
2. S’establís un sol prèmi indivisible de 5000 èuros, somés a las retengudas fiscalas fixadas per la lei.
3. Pagès Editors SL publicarà e distribuirà l’obratge ganhaire e ne cedirà 15 exemplars a l’autor. Lo contracte d’edicion, signat per l’autor e l’ostal d’edicion, serà en acòrd amb las disposicions legalas en vigor. Per la primièra edicion, los dreches d’autor son ja compreses dins la soma del prèmi.
4. Caldrà presentar tres còpias del trabalh separadament, croquetadas o religadas, e encara una quatrena còpia sus un supòrt magnetic. Los trabalhs mostraràn pas l’identitat de l’autor, mas solament lo títol e una devisa o un pseudonim. Seràn acompanhats d’una envolopa tampada sus la quala s’indicarà lo pseudonim o la devisa, e que contendrà un document amb lo prenom, lo nom d’ostal, l’adreiça, la data de naissença e lo telefòn de l’autor, e encara una notícia biobibliografica.
5. Los trabalhs seràn presentats personalament o per letra recomandada, a la Fondacion Publica Institut d’Estudis Ilerdencs, Plaça de la Catedrala s/n, 25002 Lhèida, en indicant Prèmi del Raconte en Occitan. La darrièra escasença per presentar los trabalhs es lo 19 d’abril de 2013, abans 14 oras. Tocant la presentacion dels trabalhs mandats per letra recomandada, la data indicada sus l’envolopa o sul paquet serà presa coma data valabla. L’IEI assumirà pas cap de responsabilitat per la pèrda, lo retard o los damatges causats pendent lo mandadís.
6. La jurada se compausarà de personalitats reconegudas del mond literari e academic de l’occitan.
7. Lo prèmi se poirà declarar vacant se la jurada estima que los trabalhs atenhon pas la qualitat sufisenta. Tanlèu lo ganhant informat, lo verdicte se rendrà public dins la ceremònia de remesa del prèmi, e se poirà consultar mai tard sul sit internet de l’IEI: http://www.fpiei.cat
8. Tre que lo verdicte serà rendut, las òbras non premiadas restaràn tres meses a disposicion de lors autors per que las pòscan retirar personalament o per l’intermediari de personas autorizadas a o far per lo quite autor. Los autors poiràn demandar per escrich e per una letra recomandada que los trabalhs non premiats lor sián tornats per la pòsta, dins lo relambi establit, se se son engatjats explicitament a prene en carga las despensas de mandadís, e aquel mandadís serà realizat per d’entrepresas de transpòrt especializadas. Un còp lo relambi expirat, l’Institut d’Estudis Ilerdencs destruirà los trabalhs que sián pas estats retirats. L’organizacion del Prèmi entretendrà pas cap de correspondéncia a prepaus de la restitucion dels trabalhs a lors autors.
9. La remesa del Prèmi aurà luòc al moment d’una ceremònia que comptarà amb la preséncia de l’autor premiat (dijòus 20 de junh, a sèt oras e mièja del ser, dins la cort de l’IEI).
10. La participacion al Prèmi implica l’acceptacion del reglament e del verdicte de la jurada, qu’es sens apelacion.
